Jesús OlivaA viatges podem auer ua reaccion que non mos beneficie quan mos sentem otratjadi o agredidi per ua auta persona. Ei important conéisher bèri estruments e abordatges entà per’mor que açò non succedisque, e poder hèr tèsta ara situacion d’ua manèra mès adaptada entà nosates.
Es relacions damb es autes persones pòden èster hònt de benester, diversion e connexion emocionau, mès a viatges non ei atau, e mos trobam persones que se dirigissen a nosati de manèra irrespectuosa, sense tacte o sense amabilitat. Quan era auta persona s’excedís pòt meter-mos en ua situacion complicada.
Quan mos sentem insultadi, otratjadi o agredidi, acostumam a méter en marcha un patron conductual qu’ei fòrça caracteristic e coneishut: i a qui arrespon ara defensiva (en tot retrèr-mos e en tot evitar quinsevolhe manòbra d’aproximacion), d’autes ara ofensiva (en tot tornar eth còp) e d’autes que sagen passar per naut er eveniment en tot ignorar-lo com se non auesse passat arren.
Mès tanben i a ua manèra de reaccionar-i e ei per miei d’ua labor pedagogica entà explicar, ara auta persona, per qué çò qu’a hèt non a estat corrècte.
Eth “problèma” de tot plegat ei qu’aguestes responses non acostumen a èster premeditades mès mèslèu mos gessen de laguens de forma instintiva. Alavetz, qué i podem hèr?
Des opcions anteriores n’i a dues que son es mès frequentes: tornar er atac o demorar paralisat, e açò ei çò que se coneish en anglés coma era responsa deth fight or flight (luta o hujuda). Enes darrèri ans tanben s’i a ahijut un tresau element: eth freeze (congelar-se) .
Arturem-mos un moment e analisam era situacion: i a ua diferéncia importanta entre senter-se atacat e auer estat atacat, per açò eth pas iniciau tostemp cau èster analisar se, en realitat, eth comentari qu’a hèt era auta persona a estat feridor e mespresaire o, se solament n’a estat era nòsta percepcion.
D’acòrd, tot va fòrça lèu, e pòt resultar-mos fòrça “idillic” arturar-se e soscar en moment que mos auem sentut agredidi. Respirar e compdar enquia dètz apoiridie ajudar-mos a decidir damb ua major consciéncia e mesura, mès se vedem qu’açò non ei possibla pera vertiginositat der eveniment, ei important qu’ac pogam hèr un còp era situacion a passat, de cara a aué’c trabalhat pes pròplèus còps.
Quan auem determinat que, reauments, era auta persona s’a passat cinc pòbles damb es sòns comentaris o damb aquerò qu’auem sentut qu’a estat ua fauta de respècte, ei important actuar. Pòt èster de forma tan simpla coma arrebrembar-li que i a limits que non se pòden traspassar, sigue peth hèt en se o pera relacion que mantiem.
Meter-mos ath sòn nivèu non ei çò de mès d’adequat. Torna-li en tot cridar o en tot atacar non harà mès qu’incrementar eth conflicte. Era clau ei exprimir aquerò que sentem sense mancar ath respècte der aute, e açò se coneish coma comunicacion assertiva. Ei tan facil coma seguir aguesti tres passi :
- Parlar des dera nòsta perspectiva, ei a díder, exprimir coma mos sentem nosates en lòc de centrar-mos en recriminar era conducta der aute. “Me senti dolgut quan me hès aguest tipe de comentaris” en lòc de “
Tostemp me hès mau“. - Exposar hèts concrèts e hè’c de forma objectiva en lòc de hè’c en tot generalisar.
- Hèr peticions clares: dempús d’exprimir coma mos sentem, cau a remercar qué demoram o volem der aute: “M’agradarie que non tornèsses a parlar-me d’aguest tèma“.
Òc, d’acòrd, arrespóner quan mos sentem atacadi requerís un cèrt aprendissatge, e cau un bon grad d’autocontrol, d’introspeccion e de volontat per non hè’c de forma instintiva e explosiva.
Campa coma te sentes e coma te compòrtes quan te sentes otratjat. Determina quines actituds vòs eradicar e quines te shautarie implementar e practica-ac en tòn dia a dia. Damb non guaire temps veiràs qu’ei fòrça mès facil meté’c ara practica de manèra naturau.
📎 Oliva, J. [Jesús]. (2024, 14 Agost). Com arrespóner quan mos sentem atacadi?. PsicoPop. https://www.psicopop.top/oc/com-arresponer-quan-mos-sentem-atacadi/
📖 Referéncies:
