Ès ua teatrèra (o teatrèr)

Eth parrabastatge istrionic de personalitat acostume a sorgir ena adolescència, e ei ua des condicions mès malaisides de tractar. Cau un gran compromís per part dera persona e der entorn qu’era rodeja.

Cridar era atencion, un comportament exagerat, reaccions emocionaus intenses e sense mesura, un patron a on era seduccion ei un recors constant en tota forma d’interaccion e socializacion… Eth parrabastatge istrionic dera personalitat ei un comportament sociau que se tròbe entre eth teatrau e eth dramatic. E non, non mos li cau hèr gràcia: ei un parrabastatge dera personalitat.

Toti coneishem quauquarrés damb aguest tipe de conducta, qu’afècte eth 2% dera poblacion, apuprètz: cau diferenciar, mès, ar istrionic ocasionau dera persona que patís aguest parrabastatge psicologic e que se tròbe atrapada en ua dinamica comportamentau destructiva. Era preocupacion extrèma pera sua imatge e eth sòn estat d’anim fluctuant constantament ei ua arròda de hèira emocionau. Ath delà, eth papèr dera sexualitat e eth besonh de captivar ei obsessiva e dehòra de tota convencion sociau.

Víuer damb ua persona atau non ei bric facil, mès era madeisha persona qu’ac patís tanpòc ei erosa: transitar pes dimensions des relacions afectives, era amistat o es responsabilitats laboraus son còrdes loishes malaisides de trauessar.

Normaument, darrèr deth parrabastatge istrionic de personalitat i trobam d’auti problèmes coma era ànsia, problèmes d’autoestima, traumes dera enfància… E, donques, calerà trabalhar-les totes de forma integrada.

A principis deth sègle XX s’associaue a un comportament “isteric“, quasi tostemp estacat ath genre femenin (pr’amor que d’òmes isterics non n’i auie, clar!). Mès pòga pòc se vedec qu’aguest parrabastatge acostumaue a superposar-se damb autes.

Es persones damb un parrabastatge istrionic dera personalitat hèn evident, tanben, eth parrabastatge de personalitat antisociau, narcisisme, parrabastatges dera ànsia, parrabastatges alimentaris, dependéncies e, tanben, malauties psicosomatiques .

Es critèris diagnostics deth parrabastatge istrionic de personalitat son :

• Egocentrisme.
• Cèrca d’aprobacion constanta.
• Interaccion sociau per mejan, exclusivament, dera seducccion.
• Obsession constanta pera sua aparència fisica (estrument de poder e atraccion).
• Cambiaments en sòn estat emocionau (mos arrebrembe era bipolaritat).
• Non gerissen plan es critiques, es retrèti o es avertiments (se senten heridi facilament).
• Nulla tolerància ara frustracion.
• Reaccions dramatiques vèrs hèts e problèmes comuns (Drama queens e Drama kings).
• Tendéncia a creir qu’es relacions qu’an son mès intimes deth que ac son, en realitat.
• Facilament influenciables.
• Fòrça depenenti emocionalment.

Ei d’etiologia desconeishuda, ei a díder, non se’n sap era causa o era origina deth parrabastatge, mès se cre qu’i a ua barreja de diferenti factors: genetics, abusi ena enfància, manipulacion psicologica pendent era mainadesa e era adolescència e ua educacion deficitària damb fauta de limits clars.

Eth tractament ei per miei d’era psicoteràpia, se plan non toti es pacients s’i comprometen e soent sagen manipular e desafiar quina estrategia que sigue entà hugir deth madeish tractament . Un abordatge que da fòrça boni resultats ei era terapia centrada enes solucions que se cerque per miei d’acordar per consensus damb era persona aquerò que pòt hèr qu’era situacion melhore, se trabalhe entà préner decisions e resòlver problèmes e s’ajude ar abordatge relaxat, tranquil e logic.

📎 Oliva, J. [Jesús]. (2024, 13 octobre). Ès ua teatrèra (o teatrèr). PsicoPop. https://www.psicopop.top/oc/parrabastatge-istrionic-de-personalitat/

📖 Referéncies: