Albert AlcaineDamb era pandémia dera COVID-19 un seme que ja ère en tot créisher hec eclosion de forma sobtada e potenta: eth teletrabalh. Bèri uns didien qu’aguest auie vengut entà quedar-se, mès eth hèt ei que ja ère ua practica que se hège de forma ampla en cèrtes enterpreses. Eth teletrabalh apòrte fòrça beneficis se s’aplique de forma etica, mès tanben a bèri inconvenienti.
Totun, mès enlà deth teletrabalh, trapam es hilats sociaus, es servicis de messatges e videotrucada… E tot plegat contribuís ath hèt que mos pogam sénter saturadi.
Jane Wilde Hawking didie que quan es persones lutam contra eth destin, er unic qu’impòrte ei susvelhar era subervivença .
Encara que viscam en un mon iperconnectat capable d’aufrir fòrça avantatges, auem eth déuer de susvelhar ua preciosa dimension: eth nòste benester.
Èm conscienti, segur, que mos cau méter limits envèrs determinades situacions coma gatge de patz e equilibri mentau, e era melhora manèra de hè’c ei per miei dera assertivitat. Mès ei coriós que, en moment que viuem, ajam eth besonh de hè’c massa soent.
Guardam bères chifres: enterpreses coma Telefónica reporten qu’eth pic des connexions comence tàs 9 deth maitin, un moment qu’escambiam fòrça corrèus electronics. De mejana, es jornades de teletrabalh s’alonguen enquia 10 ores en lòc d’ueit, e çò qu’ei mès cridaner: fòrça persones establissen ua part deth sòn orari laborau entre es 0h e es 3h dera maitiada. Eth motiu ei simple de compréner: non artenhen concentrar-se pendent eth dia e non an d’auta opcion que trabalhar en aguest orari que, per exemple, es mainatges dormissen.
Establir limits implique saber-se organizar.
E quan parlam d’organizar-se parlam de gerir eth temps corrèctament, donques qu’un des avantatges deth teletrabalh ei que mos permeterie non solament èster mès productius, mès tanben esvitar er estrès.
Èster en casa non signifique èster disponibla : a viatges non auem talents de sharrar, ne per chat, ne per videotrucada… E açò non signifique que refusam era persona o mos l’estimam mens… Ei simplament que, a viatges, auem de besonh mès liéger un libre o non hèr arren, e baishar es revolucions dera ment.
Non solament mos cau pensar a méter limits as auti, tanben cau méter limits a nosati madeishi, laguens dera rotina de autocura emocionau . Per açò non sonque mos cau méter barrères extèrnes de contencion contra, per exemple, ara informacion qu’arrecebem: tanben ara ruminacion excessiva (o dar massa torns as nòsti pensaments), eca. Non servís massa èster assertius damb es auti se non ac èm damb nosati madeishi!
Cada dia hèr frònt a incertituds e pòurs. Ja ac sabem, e per açò cau méter barrères – limits – ad aguesta ment qu’anticipe causes qu’encara non an succedit, ad aguestes idèes que visualizen eth pejor e que intensifiquen era ànsia.
Non se tracte solament de manejar e de controtlar aquerò que mos arribe dempús de dehòra: atier eth nòste univèrs interior ei tan important coma er aute. Cau cercar er equilibri, en saber méter limits, en auer clar qué ei çò qu’auem de besonh en cada moment, e enes relacions interpersonaus.
📎 Alcaine, A. [Albert]. (2024, 22 setembre). Es limits coma sinonim de salut. PsicoPop. https://www.psicopop.top/oc/es-limits-coma-sinonim-de-salut/
📖 Referéncies:
Opini que, tostemp que sigue possible, calerie determinar quan ei er moment de méter limits, pr’amor que çò ei fonamentau entà afrontar satisfactòriament bères situacions que pòden auer bèra repercussion emocionau.
Tanben opini, qu’eth teletrabalh, en bères ocasions, ei necessari, pr’amor qu’a nombrosi beneficis: redusir eth nombre de desplaçaments entà operar d’ua manèra mès sostenibla, evitar estrès innecesari, e tanben facilite era conciliacion familhar. Tanben ei important controlar eth temps d’usatge des hilats sociaus, pr’amor que utilizar-les mès deth compde pòt generar addiccion, e çò ei perilhós e perjudiciau.
Entà aconseguir satisfactòriament aguesti resultats pera nòsta salut mentau, ei important hèr ua planificacion realista deth temps que dedicam e deuem dedicar a cada causa, seguint critèris que presèrven era nòsta salut e que respècten es nòsti espais de descans, d’òci e relacions sociaus.